كۆساری ، ناوی (خدر مه‌حه‌ممه‌د ره‌شید) ه‌و ساڵی 1967 له‌رانیه هاتۆته دنیاوه و تا پۆلی یه‌كه‌می ناوه‌ندی خوێندویه‌تی ، ساڵی 1986 خێزانی پێكه‌وه ناوه و بووه به خاوه‌نی كچ و كوڕێك به‌ناوه‌كانی( به‌نان و شه‌یدا) ، ساڵی 1987 بۆته ڕێبوارێكی شه‌یدا و دڵ بێدار و سه‌رڕاستی كاروانی رابوونی ئیسلامیی ، له راپه‌ڕینی ئازاری 1991دا رۆڵی به‌رچاوی بینیوه و له بڵندگۆی مزگه‌وتی گه‌وره‌ی شاری رانیه‌وه شیعری حه‌ماسی خوێندوونه‌ته‌وه و جۆش و خرۆشی به راپه‌ڕین و جه‌ماوه‌ری راپه‌ڕیو داوه،
ساڵی 1992 ماوه‌یه‌ك ئاماده و پێشكه‌شكاری به‌رنامه‌ی (لێره و له‌وێ)ی ته‌له‌فزیۆنی بزووتنه‌وه‌ی ئیسلامیی ئه‌وكاته بووه له رانیه ، كۆساری جگه له كۆڕه تایبه‌تی و گشتییه‌كان ، ساڵی 1992 به‌شی یه‌كه‌م و ساڵی 1993 ش به‌شی دووه‌می شیعره‌كانی به ناوی (سه‌دای كۆساری) تۆمار و بڵاوكردوونه‌ته‌وه ، كۆساری شاعیر به‌ده‌نگه دلێر و زوڵاڵه‌كه‌یی و زه‌ینی به‌هێز و روون و له‌به‌ربوونی سه‌رجه‌م شیعره‌كانی و خوێندنه‌وه‌یان له‌به‌رڕا و وێناكردنی مانا و مه‌به‌ست و ده‌ربڕینه‌كان به ئاماژه‌ی خێرا و سه‌نج راكێش ، هه‌موانی تووشی سه‌رسوڕمان ده‌كرد ، سه‌ره‌نجام ئه‌م شاعیره بلیمه‌ت و شه‌یدای هه‌قیقه‌ت و ئه‌وینداری خاك و میلله‌ته ، له دوانیوه‌ڕۆی رۆژی 27/12/1993 له ناوماڵه‌كانی (ره‌سواجیان)ی گوندی (زه‌نگڵان) ی ده‌ڤه‌ری پشده‌ره‌ڕه‌قه‌ی سه‌ر به ناحیه‌ی سه‌نگه‌سه‌ر ، كه‌وته به‌ر ده‌ستڕێژێكی شێتانه و شه‌هید كرا و پاشان له گۆڕستانی كێوه‌ڕه‌شی رانیه به‌خاك سپێردرا.
كۆساری ، كه له ساڵی 1987 ه‌وه پێی ناوه‌ته ناو دنیای پڕ له سۆز و تاسه و حه‌ماسه‌ی شیعره‌وه و یه‌كه‌مین شیعریشی به‌ناوی (نیگاری خودان) واته: نه‌خش و نیگاری په‌روه‌ردگار له هه‌مان ساڵدا نووسیووه ، ده‌بینین هه‌ر له‌وێڕا به‌شوێن جوانی و داهێناندا گه‌ڕاوه ، به‌ڵام ئه‌و له‌وسه‌ره‌تایه‌دا زیاتر جوانیی له وشه‌دا بینیوه‌ته‌وه ، كاتێكیش دوای پێكه‌وه‌نانی ژیانی هاوسه‌رێتی ، خوای گه‌وره كوڕێكیان له ساڵی 1988به‌ناوی (شه‌یدا) پێ ده‌به‌خشێ و گزنگی رۆژێكی نوێ له ژیانیدا هه‌ڵدێت ، دیسان هۆگری جوانی ده‌بێته‌وه و شیعرێكی نوێ به‌ناوی (گزنگی خێزان) له ده‌روونی كۆسارییه‌وه له دایك ده‌بێت . به سه‌رنجدان له‌م نۆبه‌ره شیعریانه و تا سه‌روبه‌ندی پێش راپه‌ڕینیش ده‌بینین كۆساری له گه‌شتی پێده‌شتی شیعردایه ، به‌ڵام له‌گه‌ڵ نركه‌و نه‌عره‌ته‌ی راپه‌ڕین دا ، وشه له هه‌ناوی گڕگرتووی ئه‌ویشدا راده‌په‌ڕێ و بوڕكانی شیعر به‌ڕووی سته‌مدا ده‌ته‌قێنێته‌وه و یه‌كسه‌ر له پێده‌شته‌وه، پاڵ له قه‌دپاڵی چیا ده‌دا و له‌گه‌ڵ لوتكه‌دا ده‌كه‌وێته چاوشاركێ و راز و نیاز ده‌گۆڕێته‌وه.
كۆساری زۆر عه‌وداڵی وشه و شیعر و جوانی بوو ، به‌رده‌وام و به شه‌و و رۆژی روناك ، به‌چرا و شه‌داوان به شوێنیاندا ده‌گه‌ڕا و له سۆراغیاندابوو ، بۆیه هه‌میشه ده‌فته‌رێكی گچكه‌ی به شێوه به‌ڕپوت و به‌ناوه‌رۆك پڕ له گه‌وهه‌ر و یاقوتی له باخه‌ڵدا بوو ، كه لایه‌ك به تریفه‌ی شه‌به‌قی سه‌رفرازی و به بریسكه‌ی خوێنی شه‌هیدان و ئه‌ستێره‌كانی ترۆپكی سه‌روه‌ریی ده‌دره‌وشایه‌وه و لایه‌ك ئاوازی خۆشه‌ویستیی راسته‌قینه و هاوار و شین و زاری هۆنراوه و ماڕشی شۆڕشی كاكڵدار و سۆزی وڵات تێیدا ده‌نگیان ده‌دایه‌وه و له‌لایه‌كی دیكه‌وه به تاسه‌ی قه‌ڵه‌می راستگۆ و به بانگه‌وازی با به ناو و ناوك یه‌ك بین و وه‌ڵامی پڕ له سه‌رسامیی لێتان پرسیوین ئێوه چین ، ده‌ڕازایه‌وه و له‌لایه‌كی دیكه‌وه به دیمه‌نی مانگ گیران و رازه‌كانی رێبواری ماندوو و خه‌مه‌كانی پرسه وه ، چاوه‌كانی ده‌كرایه‌وه و هه‌ر ئه‌م ده‌فته‌ره پڕ له زێڕ و گه‌وهه‌ر و سۆز و په‌رۆش و ناسۆر و كه‌سه‌ره ، هه‌میشه ده‌روونی گه‌ش و روونی ، ئاوه‌ڵا بوو و بۆ ساتێكیش وێك نه‌ده‌نرایه‌وه و زۆر جاریش به ئاره‌قه و فرمێسك ده‌خووسایه‌وه!!.
كۆساری ئاوا شیله‌ی شیعری خه‌مه‌كانی نیشتیمان و هه‌قیقه‌ته‌كانی ئیمان و ئازاره‌كانی ژیانی ده‌چنییه‌وه ، بۆیه ئه‌و زۆر به‌خێرایی له پێشڕه‌وی دابوو ، تا سه‌ره‌نجام ده‌بێته هه‌ڵۆی به‌رزه‌فڕ و به‌سه‌ر لوتكه‌ی داهێنانه‌وه ده‌خولێته‌وه و ده‌بێته مه‌له‌وانی به هه‌ڵمه‌ت و گوڕ و ، گه‌وهه‌ر و دوڕڕی وشه و مانا ده‌چنێته‌وه و دیوانێكمان به نێوی بوڕكانی شیعر ، به سێ تكه‌ی (فرمێسك و ئاره‌قه و خوێن) بۆ ده‌نووسێته‌وه !!
ئیتر ئه‌مه‌یه كۆساری و چۆن تادێ زیاتر ده‌نگه زوڵاڵه‌كه‌ی له گوێماندا نازرینگێته‌وه!!؟
..){kind=link}
0 التعليقات:
إرسال تعليق